бичлэг
Хүн бүхний хайр өөр өөрийн өнгөтэй.
Илчилж үл зүрхлэх ч харцаараа бүхнийг ярилцах догдлол дүүрэн, гэгээн ариун хайр.
Өр зүрхний гүнээс өрөвдөн хайрлаж, санаа чилээн хүлээх эхийн хайр.
Дэврүүн, томоогүй насны гэнэн цайлган, анхны хайр.
Зохиолд нас насны хайрын түүхүүд гарах боловч бүгд нэг хүний дүрээр зангилагдана. Жамиль хэмээх үзэсгэлэнт бүсгүйн хайрын түүхээр хөрвүүлэн түүний дурлалт эр, өгүүлэгч өсвөр насны хүү, цэрэгт мордсон нөхөр, хадам ээжийн өөр өөрийн хайрын түүхийг хүүрнэнэ.
Зохиолын үйл явдал Киргизтсаны тал нутгийн намар цагт өрнөх бөгөөд хөдөө нутгийн айлуудын их ажил, дайны он жилүүдийн хүнд бэрх, цэрэгт мордсон эрсийн ар гэрийнхэний хүлээлтийг өнгө будаггүй энгүүн хүүрнэн өгүүлжээ.
Дайны он жилүүдэд хүүгээ хүлээсэн олон ээжүүдийн дүрийг энэ өгүүлэмж тод томруун харуулна. Хадам ээж нь Жамилийн нөхрөө хүлээх сэтгэлийг нь хатамжлан дэмнэхийн тулд эрх дураар ааш авирыг нь хүртэл ойлгон халамжилна. Харин Жамилд түүний нөхөр Садикаас ирдэг захидал ээжийнх нь хүлээлт шиг догдлол үл төрүүлнэ. Захидал бүхнийхээ төгсгөлд нэрийг нь дурдан мэнд мэдэх нь гомдол хурах нэгэн сэжүүр болсон мэт. Идэр залуу, үзэсгэлэнт бүсгүйг эргүүлж хоргоох эрчүүд мундахгүй. Омголон, эрс шулуун ааш авиртай Жамилийн харцанд харин өртөж тоогдох нь үгүй. Хэн бүхнийг үл тоомсорлох бүсгүйн сэтгэл зүрхийг бүрнээ эзэмдэх нэгэн увдис хөг эгшиг нь нийцсэн аялгуут дуунд байсныг уг түүхийг өгүүлэгч хүү Сеит хуучилна.
Дайнаас хөлөндөө хүнд шархтай ирсэн Даниярын зүрхний угаас уудлан дуулах хөг эгшиг, харцаараа бүхнийг хэлэх дотогшоо дуугуй төрх нь Жамилийн зүрх сэтгэлийг бүрэн эзэмдэнэ. Зохиолын төгсгөлийг үл өгүүлэн тэмдэглэлээ өндөрлөхийн учир уг номыг эрхэм уншигч өөрийн төсөөллөөр дүгнэн шимтэн унших нь илүү амттай гэж сэтгэнэм.
2025.05.30
Saturn Writing
